Нарăсăн 21-мĕшĕ – Пӗтӗм тӗнчери тӑван чӗлхесен кунĕ. Ăна ЮНЕСКОн Тӗп конференцийӗн пуҫарӑвӗпе 1999 ҫултанпа паллă тӑваҫҫӗ.Кашни халăхӑн хӑйӗн чĕлхи. Пирĕн  тăван чĕлхе  - чăваш чĕлхи. Тӑван чӗлхе–ӗмӗртен упранса пынă пуянлăх.  Тӑван чӗлхе, чӑваш чӗлхи – анне чӗлхи. Чăваш чĕлхи пуян та илемлĕ, янăравлă та çепĕç, паха та асамлă.Тӑван чӗлхе –асаттесен пехилӗ.  Мӗнле илĕртÿллĕ тӑван чӗлхе: шӑнкӑр-шӑнкӑр шыв юххи, вӗлтӗр-вӗлтӗр вӗрене ҫулҫи… Ваттисен сӑмахӗсем мӗнле ытарлӑ: «Пурнӑҫ -  хӳри пӑрӑнӑҫ. Хӗл пуҫтарать, ҫу салатать. Ват ҫын – тӑват ҫын…»  Тупмалли юмахсене илсе пӑхар-ха. «Тӑлӑпӗ пӳртре, ҫанни тулта. Пӗр пичче хӗлле канать, тепӗр пичче  ҫулла канать». Халăх ăсĕ-тăнĕ çутçанталăкпа пĕрле пулни курăнать.

Тӑван чӗлхепе иртекен конкурссене ачасем хастар хутшӑнаҫҫӗ. Акӑ нумаях пулмасть Пӗтӗм регионсем хушшинче иртнӗ интернет- олимпиадӑра пирӗн шкултан 5,6-мӗш классем хутшӑнчӗҫ, вĕсенчен Трофимов Андрей, Федоров Кирилл призерсем пулса тӑчӗҫ.  Вӗренӳ институчӗ ирттернӗ«Хусанкай вулавӗсем - 2021» конкурсра вара 7 класри  Гордеев Евгений, Меженьков Ярослав, Гаврилова Анжела,, Назаркина Екатерина,  6 класри Федорова Стефания поэт сӑввисене пӑхмасӑр кӑмӑла ҫӗклемелле каларӗҫ. Ҫак кунсенче 2-11 класри вӗренекенсем вара«Чӗвӗлти чӗкеҫ» конкурс ыйтӑвӗсене хуравласа ярса пачӗҫ. Пĕтĕм тăван чĕлхе кунне халалласа 6-9 классенче уроксем иртрĕç. Тĕрлĕ шÿтлĕ ыйтусене тупрĕç, ваттисен сăмахĕсене вĕçлерĕç. Кашни  класрах çĕнтерÿçĕсене палăртрĕç. «Вӗренӗр, тӑрӑшӑр! Хытӑ юратӑр тӑван чӗлхене, янравлӑрах, ҫунатлӑрах пултӑр тӑван чӗлхе! – ҫапла чӗнсе калать «Вӗҫкӗн Ваҫҫа» авторӗ Стихван Шавли.

Шухӑшла ҫакна, ӑсла:

Лайӑх вӗрен вырӑсла!

Аннӳ панӑ чӗлхерен

Ан вӑтан эс  ӳлӗмрен!

Унсӑрӑн ятна яран,

Ҫамкуна та ҫаптаран.